ЖАҢАЛЫҚТАР
Edward’s East Strategies 2024 жылғы 15 қарашадан 15 желтоқсанға дейін Қазақстанда, Өзбекстанда, Қырғызстанда және Беларусьте реттеуші бастамалар мен кадрлық ауыстырулардың ай сайынғы мониторингін дайындады.
Қазақстанда осы кезеңде Ресей Федерациясымен әріптестік туралы бірқатар келісімдер қабылданды, сондай-ақ Иран мен Сингапурмен еркін сауда туралы келісімдер ратификацияланды. Атап айтқанда, Ресей мен Қазақстан арасында 2024-2026 жылдарға арналған Аймақаралық және шекара маңы ынтымақтастық бағдарламасы бекітілді. Ал екі елдің көшбасшылары жаңа жаһандық тәртіп жағдайында стратегиялық әріптестікті тереңдету туралы бірлескен мәлімдеме жариялады. Сонымен қатар, реттеуші әсерді талдау үшін жеңіл өнеркәсіп тауарларына міндетті таңбалау мен қадағалау жүйесін енгізу жобасы жарияланды. Экологиялық заңнама саласында Қазақстан Республикасының 2024-2030 жылдарға арналған «Жасыл экономикаға» көшуі жөніндегі тұжырымдаманы іске асыру жөніндегі іс-шаралар жоспары бекітілді.
Өзбекстанда өткен парламенттік сайлаудан кейін Министрлер Кабинетінің құрамы бекітілді және елдің ДСҰ-ға кіруіне байланысты өзгерістер қабылданды. Бұдан басқа, кедендік төлемдерді төлеу туралы заңнамаға өзгерістер енгізілді, «Жасыл» экономикаға айқын көшудің тұжырымдамасы бекітілді және «Теміржол көлігі туралы» Заңның жаңа редакциясы қабылданды.
Қырғызстанда жоғары технологиялық салаларда жұмыс істейтін шетелдік азаматтар үшін «Цифрлық көшпенді» мәртебесі бекітілетін заң жарияланды. Сондай-ақ, жоғары технологиялық парктер үшін салық пен сақтандыру жарналары бойынша преференциялардың мерзімсіз қолданылуын белгілейтін заңға қол қойылды. Бұдан басқа, электрондық сауда тауарларына қатысты мәселелерді реттеуге және кедендік рәсімдерді жеңілдетуге бағытталған нормативтік құжаттар әзірленді. Кадрларды ауыстыру бөлігінде Ақылбек Жапаров Министрлер Кабинеті мен Президент Әкімшілігінің Басшысы қызметінен кетті. Оның лауазымын уақытша Әділбек Қасымалиев алады.
Беларуссияда қарастырылып отырған кезеңде азаматтық заңнама елеулі өзгеріске ұшырады. Азаматтық-құқықтық жауапкершілік институтын және шарттар туралы жалпы нормаларды жетілдіретін Азаматтық кодекске түзетулер күшіне енді. Сонымен қатар, жылжымайтын мүлікті тіркеу ережелері өзгерді: мемлекеттік тіркеу актісі іс жүзінде меншік құқығының және басқа да мүліктік құқықтардың жалғыз негізіне айналады. Сондай-ақ, шетелдік компаниялардың филиалдарын ашу тәртібі белгіленді (бұрын компаниялар елде жеке заңды тұлғаны ашу арқылы ғана бизнес жүргізе алатын). Маңызды реттеуші өзгерістер фармацевтика саласына әсер етуі мүмкін: жарияланған медициналық заңнаманы кодификациялау жобасы дәрілік заттардың айналымы мен өндірісіне байланысты түбегейлі жаңа тәртіптерді қамтиды.
Шолуларда бизнеске қызығушылық тудыратын басқа да нормативтік құқықтық актілер мен тағайындаулар келтірілген.